काठमाडौँ । गोरखाको एक सहकारीमा चोरी भएको छ । जिल्लाको बारपाक सुलिकोट गाउँपालिका-५ थालेस्थित पिपलबोट कृषि सहकारी संस्थामा चोरी भएको हो । 

सहकारीको कार्यालय तोडफोड गरेर २ लाख १५ हजार रुपैयाँ चोरी भएको बताइएको छ । सहकारीका अध्यक्ष रामबहादुर खड्काका अनुसार शनिबार राति कार्यालयको मूल गेटको चाबी र लकरको चाबी फोडेर रकम चोरी गरेको देखिएको छ । 

सहकारीको उक्त भवन गाउँदेखि अलि पर एकान्त जस्तो ठाउँमा भएकै कारण चोरी हुँदा थाहा नपाएको हुनसक्ने प्रहरीले जनाएको छ । उक्त भवनमा सिसिटिभी जडान नभएकाले चोरको पहिचान गर्न कठिनाइ भएको प्रहरीको भनाई छ । 

यद्यपि घटनाबारे थप अनुसन्धान गरिरहेको प्रहरीले जनाएको छ । उक्त सहकारी २०७२ बैशाखमा खुलेको थियो ।