काठमाडौँ । नेपाल इन्फ्राक्टक्चर बैंक (निफ्रा)ले सेयरधनीलाई धोका दिएको छ । साधारणसभा सम्बन्धी सूचनाबाट लाभांश दिनेबारे सञ्चालक समितिले गरेको निर्णय हटाएर बैंकले सेयरधनीलाई धोका दिएको हो ।

यसो त बैंकको सञ्चालक समितिको बैठकले चुक्ता पूँजीको ६.३१५ प्रतिशतले हुन आउने एक अर्ब ३६ करोड रुपैयाँ लाभांश बाँड्ने निर्णय गरेको थियो । 

सञ्चालक समितिले लाभांशबारे गरेको उक्त निर्णयबारे भदौ २० गते नेपाल स्टक एक्सचेञ्ज (नेप्से)लाई पत्राचार गर्दै जानकारीसमेत गराएको थियो । बैंकले नेप्सेमा पठाएको पत्रमा भदौ १९ गते बसेको सञ्चालक समितिको बैठकले लाभांश वितरण गर्नेबारे निर्णय गरेको पनि उल्लेख गरिएको छ ।

तर, साधारण सभाको सूचनामा भने बैंकले लाभांश पारितको एजेन्डा नै हटाएको छ । बैंकले जारी गरेको सूचना अनुसार साधारण सभा मंसिर २३ गते बत्तिसपुतलीस्थित अनुपम फुडल्याण्डमा हुनेछ । साधारण सभामा सञ्चालक समितिको प्रतिवेदनमाथि छलफल गर्ने, नाफा नोक्सानको हिसाब, नगद प्रवाह विवरण, पुँजीमा भएको परिवर्तन लगायत तत्सम्बन्धी अनुसूचीहरूमाथि छलफल गरी स्वीकृत गर्ने र लेखापरीक्षक नियुक्ति, उनको पारिश्रमिकजस्ता विषयमा छलफल गर्ने एजेन्डा तोकिएको छ । 

तर, सञ्चालक समितिले गरेको लाभांश वितरणको निर्णय उक्त सूचनामा उल्लेख नै गरिएको छैन । यसो त साधारण सभाको सूचना जारी गर्दा महत्वपूर्ण विषयमा गरिने छलफलको एजेन्डा उल्लेख गर्नुपर्छ । तर, बैंकले लाभांशजस्तो गम्भीर विषयलाई समेत सूचनामा समावेश नै नगरेर धोका दिएको भन्दै सेयर लगानीकर्ताहरुले असन्तुष्टि जनाएका छन् ।