काठमाडौँ । सर्वोच्च अदालतले विद्यालयमा नेपाली वा मातृभाषा बोलकै कारण विद्यार्थीलाई कारवाही नगर्न परमादेश जारी गरेको छ । न्यायाधीश टेकप्रसाद ढुंगाना र शान्तिसिंह थापाको संयुक्त इजलासले यस्तो परमादेश जारी गरेको हो । 

निजी विद्यालयहरुले विद्यालयमा नेपाली वा मातृभाषा बोलकै कारण कारवाही गर्न थालेपछी कानूनका विद्यार्थी आयुष बडाल, स्मृति अधिकारी र विवेक बख्रेलले जेठ १३ गते सर्वोच्चमा रिट दायर गरेका थिए । 

रिटमाथि सुनुवाइ गर्दै न्यायाधीश सुनिलकुमार पोखरेलको एकल इजलासले जेठ १४ गते कारण देखाउ आदेश र अल्पकालीन अन्तरिम आदेश जारी गरेको थियो । तर, अहिले भने अदालतले विद्यालयमा नेपाली वा मातृभाषा बोलेकै आधारमा विद्यार्थीलाई कारवाही नगर्न परमादेश नै जारी गरेको छ । 

योसँगै अब निजी विद्यालयहरुले नेपाली वा मातृभाषा बोलेकै आधारमा विद्यार्थीलाई कारवाही गर्न नपाउने भएका छन् । यसका बावजुत पनि कसैले विद्यार्थीलाई कारवाही गरे उक्त कार्य अदालतको आदेशको अवहेलना र गैरकानूनी कार्य ठहरिनेछ ।